പാലം കുലുങ്ങും...............!!!

അത് ഒരു തുരുത്തായിരുന്നു. ഏറെ പാവങ്ങൾ അധിവസിക്കുന്ന ഒരു കൊച്ചു തുരുത്ത്. തുരുത്തിലെ നിവാസികൾക്ക്  ചുറ്റുമുള്ള വെള്ളത്തിനപ്പുറത്തെ വിഭവ സമൃദ്ധമായ കരയിലേക്ക്  പോകാൻ ഭയമായിരുന്നു. അക്കരേക്കുള്ള പാലം കുലുങ്ങും എന്ന ഭയം! ഒരു ദിവസം ആ തുരുത്തിലേക്ക് എവിടെ നിന്നോ ഒരു കേളൻ വന്നു. ദാരിദ്ര്യത്തിൽ ഉഴലുന്ന തുരുത്ത് നിവാസികളോട് അക്കരേക്ക് പോയി സമൃദ്ധി നുകരാൻ കേളൻ ആജ്ഞാപിച്ചു. കേളൻ പകർന്ന ആത്മവിശ്വാസത്തിലും, ധൈര്യത്തിലും അവരെല്ലാം അക്കരെ ചെന്ന് സമൃദ്ധി നുകർന്നു. തുരുത്തിലെ ഇല്ലായ്മയെ മുതലെടുക്കാൻ  തുരുത്തിലേക്ക് സാധനങ്ങൾ എത്തിച്ചിരുന്ന കച്ചവടക്കാർ കണ്ടെത്തിയ സൂത്രമാണ്  പാലം കുലുങ്ങും എന്ന തട്ടിപ്പെന്ന് കേളൻ  തുരുത്തു നിവാസികളെ  ധരിപ്പിച്ചു. അക്കരെ ചെന്ന് സമൃദ്ധി നുകർന്നതിന്റെ  ഒന്നാം ദിവസം തുരുത്തു നിവാസികൾ  ഉറങ്ങിയത്  രാവേറെ ചെന്നതിനു ശേഷമായിരുന്നു.പിറ്റേന്നു കാലത്ത് സമൃദ്ധിനുകരാൻ അക്കരേക്കു പോകാൻ പാലത്തിനടുത്തെത്തിയ തുരുത്തു നിവാസികൾ തരിച്ച് നിന്നുപോയി..............പാലത്തിലതാ കേളന്റെ ചേതനയറ്റ    ശിരസ്സ് .......! ഒപ്പം ഒരു ബോർഡും-“പാലം കുലുങ്ങും”