ഉയരവും വലുപ്പവും

ഭൂമിശാസ്ത്രം ക്ലാസ്സിൽ വച്ച് മാഷ് പിള്ളേരോട് ചോദിച്ചു:“ഏറ്റവും ഉയരമുള്ള കൊടുമുടി ഏത്?

അപ്പോൾ മാഷിനൊരു ഫോൺ വന്നു.

ഉത്തരം പറയാൻ ഊഴം കാത്തപിള്ളേരോട് വലതു കൈ ഉയർത്തി അടങ്ങാൻ ആംഗ്യം കാട്ടി മാഷ്,ഇടത് കൈകൊണ്ട് കൈ ഫോൺ ചെവിക്ക് ചേർത്ത്  മറുതലയെ കേട്ടു:

“മോനെ ഇതമ്മാവനാ.ആ പ്രൊപ്പോസൽ ശരിയാവില്ല.ആ പെണ്ണിന് വേറെ ..............വിട്ടുകള മോനെ.ഞാൻ വീട്ടിൽ വരുന്നുണ്ട്.”

ഞാൻ അങ്ങോട്ട് തിരിച്ചു വിളിക്കാം എന്ന് വെറുതെ പറഞ്ഞ് മാഷ്,കോൾ കട്ടാക്കി.

“മാഷേ എവറെസ്റ്റ്........എവറെസ്റ്റ്” എന്ന് വിളിച്ചു പറയുന്ന കുട്ടികളെ നോക്കി തന്റെ ഹൃദയം കവർന്ന ‘നീലിമ’യുടെ ഹൃദയത്തിന്റെ അജയ്യമായ ഔന്നത്യത്തെ അയാൾ വെറുതെ ഒന്നു കൂടി ഓർത്തു. അതിനു മുൻപിൽ എന്ത് എവറെസ്റ്റ്?

ഇനി അടുത്ത ചോദ്യം:“ഏറ്റവും വലിയ കടൽ ഏതാണ്?”

ഉത്തരം പറയാനൊരുങ്ങുന്ന കുട്ടികളെ തടഞ്ഞു കൊണ്ട് മാഷിന്റെ ഫോണിൽ ഒരു കോൾ വന്നു.പെങ്ങളാണ്. സ്ത്രീധന ബാക്കി കൊടുക്കാഞ്ഞതിന്  അളിയൻ പിന്നെയും വയലന്റായീന്ന്!

പിന്നീട് വിളിക്കാമെന്ന് മറുതല തന്നെ പറഞ്ഞപ്പോൾ  മാഷ് ഫോൺ കീശയിലിട്ടു.

“മാഷെ ......ശാന്തസമുദ്രം.....ശാന്തസമുദ്രം.....എന്ന് മാഷിന്റെ അശാന്തമായ മനസ്സിലേക്ക് പിള്ളേർ ഉത്തരമെയ്തു.

അശാന്തമായ മനസ്സിന്റെ ആഴവും പരപ്പും ഏതു ശാന്ത സമുദ്രത്തിനുണ്ട് എന്ന് സ്വയം ചോദിച്ച് മാഷ് അടുത്ത ചോദ്യത്തിലേക്ക് കടക്കും മുൻപ് ബെല്ലടിച്ചു.

      കപ്പലുണ്ടാക്കാൻ പാങ്ങില്ല. ഉയരം കീഴടക്കാൻ കോപ്പുകളുമില്ല. ആശക്ക് വകയുള്ളത് അടുത്ത മുക്കാൽ മണിക്കൂർ ഫ്രീയാണെന്നുള്ളതു മാത്രമാണ്. അയാൾ ഫ്രീ പിരിയഡിന്റെ ചെറു കുളത്തിലൊന്നു മുങ്ങാൻ പോയി.